გურამ დოლიძე
საკონტაქტო ინფორმაცია

დავიბადე საქართველოს დედაქალაქ თბილისში,1930წელს 22 მაისს (ზუსტად ამ წელს და ამ რიცხვში დაიბადა დიდი რუსი მხატვარი ილია რეპინი!!!).

აღარ მახსოვს როდის დავიწყე ხატვა, ალბათ ფუნჯით და ფანქრით ხელში დავიბადე.

1956 წელს დავამთავრე თბილისის სახელმწიფო სამხატვრო აკადემია. ჩემი პედაგოგები იყვნენ გამოჩენილი მხატვრები: ს.ქობულაძე, ვ.შუხაევი, დ.გაბაშვილი, გ.ჯაში, შ.კუპრაშვილი, შ.მიქატაძე, დ.ციციშვილი.

თუ ქედმაღლობაში არ ჩამომართმევთ,ვიტყვი, რომ მხატვრობის მრავალ დარგაში მიყვარდა და მიყვარს მოღვაწეობა, ასე მაგალითად, მცირე ზომის პლასტიკაში: დ.კლდიაშვილის ”სამანიშვილის დადინაცვალი”, და ”სოლომონ მორბელაძე”, ი.ჭავჭავაძის ”კაცია-ადამიანი?!”, აგრეთვე ”იმერელი აზნაურები”, ”მკითხავი”, ”გალაქტიონი”, და მრავალი მცირე ზომის ქანდაკება. აგრეთვე გრაფიკასა და ფერწერაში: ”პარიზი, მონმარტი”, ”კეთილი, მოხუცი მასხარა”, ”ბებერი მეზურნეები”, ”მასხარა და სიყვარული”, ”წმინდა ნინო”, ”მე და ღამე” და სხვა. მაქვს აგრეთვე მრავალი დეკორატიულ-მონუმენტური ნამუშევარი; მაგალითად ქ.მოჟაისკის მემორიალური ცენტრის დიდი ფერწერული პანო ”ბაგრატიონი”, ქ.მონინოს საზღვაო ფლოტის დასასვენებელი სახლის კედლების მოხატულობა: ”მუზა”, ”რუსული ტროიკა”.

საქართველოში: საგარეჯოს ბავშვთა დასასვენებელ კომპლექსში, შამოტში შესრულებული გორელიეფები; ქ.ქუთაისში პათ.ანატომიის ცენტრის გაფორმება, დიდი ზომის გორელიეფები: ”მედიცინა”, ”ჰიპოკრატეს სკოლა”. ვმუშაობ წიგნის ილუსტრაციებზე.

ბავშვობიდან, ანუ სკოლის მერხიდან მიყვარდა მასწავლებლებზე და ამხანაგებზე კარიკატურებისა და შარჟების ხატვა. ვარ სამხატვრო აკადემიის ხატვის კათედრის პროფესორი, მიმყავს ხატვის კურსი სხვადასხვა ფაკულტეტებზე, მაქვს რამდენიმე ნაშრომი ხატვის მეთოდიკაზე.

1980-იან წლებში შექმნილი გრაფიკული ტრიპტიქი პოსტსაბჭოურ თემაზე ”სატანის ზეიმი საქართველოში” დაცულია ქ.ნიუიორკში, ა.შ.შ. ჩემი მრავალი ნამუშევარია კერძო კოლექციებში: მოსკოვში, ვენაში, სტოკჰოლმში, ჩიკაგოში და სხვა ქალაქებში.

კიდევ რა შემიძლია ვთქვა ჩემს შესახებ?.. ალბათ ის, რომ ძალიან მიყვარს პოეზია : შოთა, ილია, აკაკი, ვაჟა და გალაქტიონი,… სულო ცოდვილო და მეც ვწერდი და ახლაც ვწერ ლექსებს… ისე ჩემთვის. ახალგაზრდობაში გატაცებული ვიყავი სპორტით: კალათბურთი, ფეხბურთი, კრივი, მძლეოსნობა, მაგიდის ჩოგბურთი. ახლაც კი 72 წლის ასაკში მიყვარს ახალგაზრდებში გარევა, მათთან შეჯიბრი.

გურამ დოლიძე იღებს შეკვეთებს გრაფიკასა და ფერწერაში. ფასი შეთანხმებით.

საკონტაქტო მისამართი,
ტელ.: +(995-32)38 69 03.
ელ.ფოსტა: This e-mail is protected from spam-bots. To see it you have to enable JavaScript.